Homily Pentecost: Ebitone bingi naye mwoyo mulala

Homily for Pentecost Year A 2026

Introduction

Aboluganda nihuhusa Pentekoti nnenda hulowose huhitu hino.

Nihiba inti abembi bajile nghano ohwemba mumisa, naye buli mutu gembaanga bibye; omuhubi wenghoma gehubila bibye, owa soprano geemba amalowozi gage, abasajja batandiha olwembo lwabwe olwenjawulo; owe piano yesi gatandiha olwembo mumalowozi gage. Hina ehyahabayengho?.......

Hyahabaye luhelo, ohuwunga, nohutawuha.

Naye abembi nibemba olwembo lulala, banghulisiganya, bahoolela nghalala, ohwemba huba hulanghi, nga luhunghuliye mulwembo lwamayingila.

Aboluganda ago njamawulile ga Pentekoti. Yezu atusindihila Mwoyo Mutukirivu, sihutusangho enjawulo, naye ohuleta abatu abenjawulo nghalala.

Scripture and Theology

Muusomo elisooka olwalelo, abatu baali batinile muyerusalemu nibaghweleye mumawanga agenjawulo. Abandi eroma, abandi emisiri, abawalabu, asia, nebifwo ebyenjawulo. Balomaanga enimi ejenjawulo.

Ate abatume lubafuna Mwoyo Mutukirivu batandiiha ohubulila, ehitu ehyenghunyisa shyagwango: buli mutu ganghulila amawulile mululimi lulwe. Hili nga ese lutandiha ohubulila mulungeleza nga buli mutu nghano gatandiha ohupulila mu lulimi lulwe: olunyole, olugisu, olugwere, oludama, oluteso, ninghanghuma mutafuta. Lyaali ewulile elala naye abatu benjawulo bayitegela. Guno gwali mulimo gwa Mwoyo Mutukirivu. Mulugelo lwomunaala gwa Babel, abatu beyaawulamo nibatasobola hutegelegana, naye olwa Pentekoti Mwoyo Mutukirivu gagobosa abatu nghalala.

Eshyekabi embi mushaalo shefwe, ebisela bingi huwona enjawuhana munimi, ekabila, ebiha, simubitone naye hutabula nahusoola. Abatu bayinza ohulowosa inti “bano sibatu befwe.” “Sibekabila yefwe.” “Sihubesiga.” Ebisera ebindi hufuna amasina gahuta hubatu abatali befwe. Muluganda babalanga “banamawanga”, muluteso “emoit.” Simanyile oba mulunyole nolugwere nimuli namasina agengeri eyo.

Naye Pentekoti etusomesa ehitu ehyomuwendo: Mwoyo Mutukirivu sigenona enjawuhana jefwe. Atabaganya abatu mumaka ga hiwumbe. Owona hiwumbe sigatutonda ohufwanana. Abandi bapi ngeese no mwami Wadinda, abandi balenghi; abandi bahasi abandi basaja;  abandi bahosa abandi bamali.  Naye atulanga fwesi ohuba bakristu.

Njehigila Paulo omugwalafu musomo lyohubili aloma ati. “ebitone bingi naye mwoyo mulala”

·        Omutu mulala geemba, owundi gasomesa omugigi

·        Omutu mulala ashalila abalwaye, owundi ganyilisa ekelezia.

·        Omutu mulala alima gagabana emele nabalilwana, owundi musomesa mulanghi asomesa abana befwe, oba omusanghu atujanjaba nihulwaye.

Amazima ebitone byenjawulo naye Mwoyo Mutukirivu abitungha aba mulala.

Mubisela bya Paulo Mugwalafu abatu baali beyawulamo. Yaliyo abajudaya nabagereki. Yaliyo abasibe nabaali abedembe. Abandi bajelegangaa abashawe olwebyafwayo byabwe no bugaga.

Naye Paulo alomaati nihufuha abakrisitu ohweyawulamo huno sihyamahulu nyo. Hulwahi? Olwohuba “mumwoyo mulala hwabatisibwa mumubili mulala.” Ehitegesa inti huli baana bahiwumbe. Wade nghaliho enjawulo mukabila, ehiha, obugaga, nobwaafu, ohusoma, oba ohutasoma, huli bakristu nghalala.

Paulo atungha ehyohubonelaho: omubili gwomutu. Omubili guli nebitundu bingi: emoni, amatwi, amagulu, omunwa. Emoni sesobola hulomela omuhono inti “sikwetaaga”; Ohugulu sihusobola huloma inti “sinetaaga emoni.” Buli hitundu hyamugaso. Mungeli enyeneeyo buli mukristu wamugaso mu kelezia.

Christian Life

Hino huhihozesa hutye mubulamu wefwe obwabakristu.

Aboluganda, hahugoboleyo hushohubonelaho shabembi. Sibuli mutu inti gemba eshifwo shilala. Abandi alto, abandi tena, soprano, oba besi. Abandi bahuba engoma. Abandi bahulembela ohwemba. Ese kubangaho enanga nimba inti sindi huhulembela emisa.

Buli mutu naba nigemba showashye ohwemba sihwahanyumile. Buli mwembi anembela nghamugulu ohusingaho abashye, yahabayengho ohuwunga ohwanghamugulu. Naye nibanghulisiganya, olwo olwembo luba lulanghi. Eyo nje engeri yi Mwoyo Mutukirivu ahola mukelezia.

Amazima buli mumisa husabila obulala, yade ebisela bingi sihubitegeela. Consekrasio niyinghwa omusaserdoti asaba: “efwe abaalya omubili nomusaayi gwomwana wuwo hwijule Mwoyo Mutukirivu hufuhe mwoyo mulala nomubili mulala mukristu.” Eyo nje Pentekoti. Mwoyo Mutukirivu atufula shilala mumago gakrisitu.

Mwoyo Mutukirivu ayeeda abatu ohumenya nghalala mudembe. Anghanghuma Mwoyo Mutukirivu nghabangho, ebuba, ohuchawa abekabila ejindi, olugambo, obuchai, nohweyawulamo. Naye Mwoyo Mutukirivu yali nghabangho edembe, ohusonyiwa, obulala, obugumikiriza, nohwenda.

Nje ehigila Yezu muvanjiri yolwalero aloma ati: “edembe libe ninemwe” inga angho afuungha Mwoyo Mutukirivu hubatume babe. Nibahili ohufuna Mwoyo Mutukirivu, abatume baali benghendeheleye nibeyigaliye munyumba. Naye lubafuna Mwoyo Mutukirivu, bafuna obugumu batiina ohubulila evanjili. Mwoyo Mutukirivu gachusa abasaja abaati gabafuula abajulizi ba kirisitu abagumu. Ate ayinza ohushituholela feesi.

Naye aboluganda, ebisela bingii hulowosa huti Mwoyo Mutukirivu aholela mumbela embala oba mubwakatemba, abatu nibasabila mudobozi elyanghamugulu, nibemba namaani, oba ohulomela munimi.

Ehitifu hili nti, ebisela ebisinga Mwoyo Mutukirivu aholela mumangholeye. Ebyohuboneraho bino:

·        Ayeda omuhasi ohwenyuha mangu ohulabilila omwana omunghele owile.

·        Ayeeda omusaja ohweyongela nataamba namani alabilile amaka gage yaade embela imbi.

·        Ayeeda abalilwana ohusonyiwagana nibahanghwa mubutabanguho.

·        Anghelesa abalwaye obugumikiliza, obugumu.

·        Atuyeda ohulonda amazima muhifwo hyenguzi, edembe muhifwo hyohwesasuza, amazima muhifwo shyohudulinga.

Ebisela ebisinga obunji sihuhitegela naye Mwoyo Mutukirivu atelesa obulamu bwefwe mumangholeye.

Conclusion

Aboluganda, hulunaku lwaPentekoti; leha hwebuse:

·        Ndeta obulala mumaka gange, muhifo hyihola, hyuhyalo, oba ndeeta enjawuhana?

·        Hosesa ebitone byange ohunghelesa abahyange?

·        Nebasa ebitone byabahyange ebyawuha hubyange?

Naye ohuhola bino byosi hwetaaga Mwoyo Mutukirivu.

Kale hahusabe ni huhozesa ebigambo byezabuli: “musengwa sindiha  mwoyo wuwo achuse efwanana yeshalo.”

Hulehe Mwoyo Mutukirivu achuse emyoyo gyefwe, amaka gefwe, ebyalo byefwe, eparish yefwe. Nga lumalobozi mangi hulwa Pentekoti, ngalumalowozi mangi muhwemba, leha husigale benjawulo naye husigale shilala mu Kristu.